Banda Bacana é un proxecto de nova creación que trae ós escenarios a mellor fusión dos ritmos afrolatinos coa poesía galega e conta con un directo cheo de enerxía e dinámico que farán bailar e cantar a todos os públicos. A banda está formado por 8 músicas con ampla traxectoria e carreira profesional en diferentes proxectos en activo que da como resultado unha sonoridade moi particular cunha gran riqueza de timbres e matices.
Sinopse Xira Bacana
“Xira Bacana” trae ós escenarios un repertorio orixinal onde a mestura dos ritmos de raíz afrolatina e a poesía galega, portuguesa e iberoamericana ofrece ó público un espectáculo para bailar, desfrutar e vivir en directo as conexións existentes entre diferentes culturas. A través da nosa música queremos resaltar o intercambio e a influencia mutua que a través da emigración se produce entre Galicia, Portugal e alén do atlántico, debuxando un camiño musical de ida e volta, desde Galicia a Centroamérica, desde Portugal a Brasil. Irmandade entre culturas afastadas no mapa, pero moi perto a nivel espiritual.