A vocalista e compositora galego-suíza foi premiada como “Artista do Ano” nos Premios Martín Códax da Música 2022, nos que tamén recibiu o galardón como mellor proxecto na
categoría de “Blues, Funk e Soul”. Recoñecementos que viñeron da man do seu novo disco, “But Life Is Beauty Full”, co que anda a xirar cun potente e luminoso sexteto como banda para directos.
Compositora, letrista e vocalista do proxecto, Nastasia continúa a florecer na súa carreira profesional asentando con este terceiro disco a súa colorida, persoal, creativa e inigualable pegada artística.
Xira #TheBeautyFullTour
Nun enérxico e dinámico espectáculo musical, a banda ofrece un concerto ecléctico e rico en variedade de estilos e de linguas: neo-soul, afro-pop-folk, R&B contemporáneo así como sonoridades étnicas das músicas do mundo cantadas en galego, castelán, inglés e francés.
Estamos ante un dos proxectos máis interesantes do panorama musical galego que, abandeirado polas súas vitoreadas cancións e manexo dos instrumentos, desprende swing e enerxía en coidados ambientes cheos de emocións e momentos corais co público.
The Beauty Full Band
Formada por músicos clave da escena musical galega, o potente e elegante sexteto da vocalista está formado polo seu productor, arranxista e man dereita Adrián Saavedra ao baixo e teclados; o seu inseparable guitarrista e corista Mon Orencio (Mister Cool); a virtuosa vocalista e multiinstrumentista Carmen Rey ao piano e coros; o versátil Bruno Couceiro á batería; e o polifacético Félix Rodríguez ao set de percusións.
